Менаџерот на Ливерпул вели дека неговите фудбалери мора да останат незаситни доколку сакаат да имаат добри резултати.

Ливерпул утре (18.30 ч.) го има првиот вистински тест оваа сезона, го пречекува Арсенал во дербито на третото коло од Премиер лигата. Екипата на Арсенал, летово донесе неколку врвни засилувања со кои амбициите на клубот пораснаа, но менаџерот Унаи Емери изјави дека „би сакал никогаш да не мора да игра против Ливерпул“.

– Емери нормално дека не беше сериозен кога го изјави тоа и нема потреба да се коментира таа изјава. Но, сакаме да бидеме екипа против која никој нема да сака да игра. Мора да напаѓаме и да се браниме. Мора да го даваме максимумот во текот на целата сезона. Ние сè уште не сме на нивото од минатата сезона. Не треба да бидеме совршени, само подготвени – вели Јирген Клоп, менаџерот на Ливерпул.

Германецот пред дуелот со Арсенал откри по што неговиот тим е поразличен од останатите конкуренти, како во Премиер лигата така и во Лигата на шампионите.

– Имаме одличен тимски дух. Триумфиравме во ЛШ и би било чудно да не е така. Во овој момент е важно да сме пријатели. Треба да бидеме лути и незаситни за да имаме добри резултати цела сезона – потенцира Клоп.