Владата донесе програма за наредните четири години, за тоа какви специјалисти и супспецијалисти се потребни во здравствените домови и во клиничките болници во Македонија. Програмата е објавена во Службен весник на први август и кога ќе се погледнат бројките на специјализации и супспецијализации што се одобрени во клиничките болници во Битола и во Прилеп, евидентно е дека овие болници всушност кубурат со лекари од сите можни специјалности и таму – нема што нема!

Во Јавната здравствена установа „Доктор Трифун Пановски“ во Битола наредните четири години од 2023 до 2026 година одобрени се дури 133 специјализации, а во прилепската болница 120 специјализации и супспецијализации. Најголемиот дел од лекарите се веќе вработени во болниците, а кога ќе ја завршат специјализацијата се обврзани со договор да останат на работа во државното здравство. Со приватните специјализации е поинаку, односно докторот сам си ја плаќа специјализацијата, ама по завршувањето може да се вработи во приватна ординација или да замине да работи во странство односно не е обврзан да му служи на државниот здравствен систем.

Во битолската болница наредните четири години одобрени се 7 специјализации за анестезиологија со интензивна медицина, 8 за педијатрија, по 1 васкуларен хирург и гинеколог, 14 интернисти, 6 инфектолози, 4 кардиолози, 3 невролози, 4 неврохирурзи, 8 општи хирурзи, две специјализации за онкологија, 4 офтамолози, 5 психијатри, 6 ортопеди, 4 трауматолози, 8 специјализации за ургентна медицина, 6 за физикална медицина, 3 за патологија, две за судска медицина, 4 за уролошка хирургија и една за испитување на контрола на лекови. Супспецијализации во битолската болница се предвидени за трауматологија, дијабетологија, урогинекологија, пулмологија и алергологија и дигестивна хирургија.

И во Прилеп ситуацијата изгледа алармантно според доделениот број на специјализации од сите возможни области на медицината за наредниве четири години, вкупно 120. Од 2023 до 2026 година одобрени се 8 специјализации за анестезија со интензивна медицина, 6 за педијатрија, 4 за гинекологија, 3 за дерматовенерологија, 2 за ендокринологија, 9 за интерна медицина, 2 за инфектологија, 1 за кардиологија, 5 за неврологија, 1 за нефрологија, 1 за нефрологија, 8 за општа хирургија, 8 за ортопедија, 3 за психијатрија, 7 за радиологија итн. Во Прилеп одобрени се супспецијализации за неонатологија, дигестивна, уролошка и гинеколошка радиодијагностика, педијатриска нефрологија, кардиологија и пулмологија, ревматологија и кардиологија, како и за нефрологија.

Во ЈЗУ Општа болница Охрид каде што се алармираше дека нема педијатри, годинава се предвидени две специјализации за педијатрија, и уште три до 2026 година. До 2026 во оваа болница одобрени се 8 специјализации за анестезија со интензивна медицина.

Од друга страна пак, во некои здравствени домови, ќе биде сиромашно со специјализации. На пример во Здравствен дом Гостивар, за наредните четири години се предвидени само три специјализации и тоа за педијатрија и за ургентна медицина. Во Здравствен дом Куманово одобрени се само две специјализации една за оториноларингологија и една за офталмологија. Во Здравствен дом Скопје ќе има 4 нови специјалисти по педијатрија и неврологија, двајца ортопеди, четворица оториноларинголози, 6 офталмолози, 2 радиолози, 8 специјалисти по физикална медицина и 10 детски стоматолози.

„Потребата за специјалистички и супспецијалистички кадри се утврдува врз основа врз основа на бројот и старосната структура на специјалистите, односно супспецијалистите, времето на чекање на електронската листа на закажани прегледи и интервенции и потребата од користење специјалистичко-консултативни и болнички здравствени услуги во општината. Програмата се носи на предлог на Советот за специјализации формиран од министерот за здравство. Приватните специјализации се во надлежност на факултетите и Министерството за здравство не одлучува за нив“, изјавија од Министерството за здравство за „Слободен печат“.

Јавните здравствени установи се должни да обезбедат пари за да ја спроведат програмата, бидејќи станува збор за државни специјализации и супспецијализации. Советот што ја има донесено оваа програма има 9 члена од кои по еден од Лекарската, стоматолошката и фармацевтската комора (задолжително е да се професори на Медицинскиот факултет), четири члена од Министерството за здравство и по еден член од Министерството за образование и од Фондот за здравство.