Десеттина месеци може да се развлече периодот до кога ќе се добие одговор за дополнителните проверки на декларираната царинска вредност на приложените фактури кон увозните царински декларации, предупредуваат од Царинската управа на Македонија. Откако во јавноста беа изнесени сомневања дека се приложувани лажни фактури при увозот на земјоделски производи, по извршената анализа за период од 1 јануари до 6 април 2023 година, Царината пратила фактури приложени кон увозните царински декларации за 11 увозници во царинските администрации на Грција, Србија, Турција и Албанија, од каде се увезени овие производи. Дополнително, увозните фактури на двајца увозници за ланскиот декември се пратени до грчките цариници.

– Според меѓународните спогодби со кои се регулира оваа административна соработка меѓу царинските служби, предвидени се рокови од 10 месеци за одговор на овие барања од царинската служба на земјата извозник – велат од Царината.

Од оваа институција нагласуваат дека ако добиените одговори од царинските администрации ги потврдат сомневањата дека се приложувале лажни фактури при увоз, за овие компании ќе се поведе постапка за дополнителна наплата на избегнатите давачки, а во зависност од сумите, може да се утврди прекршочна или кривична одговорност.

– Царинската управа врши анализа на приложените фактури кон увозните декларации за земјоделски производи и за претходните три години, според законски предвидениот рок. Доколку од анализата произлезат сомневања за веродостојност на приложените фактури кон увозните декларации и од други увозници, тие ќе бидат пратени на проверка до царинските служби на земјите од каде се извезени – додаваат од Царината.

Ќе има мерки за оние царински службеници, кои не постапиле во согласност со законските прописи при спроведување на царинската постапка, децидни се од ЦУРСМ.