Владата донесе одлука со која се спојуваат концесиите за рудникот за експлоатација на минерална суровина руди на бакар и злато на локалитетот с. Иловица, Општина Босилово, со концесијата за експлоатација на минерална суровина руди на бакар и злато на локалитетот с. Иловица- Општина Босилово и Општина Ново Село. Одлуката е веќе излезена во Службен весник, а потенцијалната концесија ќе трае до 2042 година. Со објавата повторно се отвори пат да се почне со експлоатација на бакар и злато од струмичката околина. Според одлуката која е објавена во Службен весник излегува дека ќе има два ископа. Никој од градоначалниците на општините во чиј локалитет се наоѓа потенцијалниот рудник вчера не сакаше да даде изјава.

-Одлука за спојување на концесијата за експлоатација на минерална суровина руди на бакар и злато на локалитетот с. Иловица, Општина Босилово, со концесијата за експлоатација на минерална суровина руди на бакар и злато на локалитетот с. Иловица Општина Босилово и Општина Ново Село на Друштвото за производство промет и услуги Еуромакс Ресоурцес од Скопје- стои во објавата на Службен весник.

Оваа одлука предизвика лавина реакции кај жителите на Босилово и Ново Село и граѓанските организации кои неколку години наназад се борат за зачувување на овој земјоделски крај. Се огласи Зелената партија- ДОМ која бара од Министерството за економија и Владата, како и од општините Босилово и Ново Село, да не дозволат изградба на рудникот „Иловица-Штука“.

-По владината одлука за спојување на концесиите, сериозна е загриженоста дека се планира отворање на овој рудник- велат од партијата.

ДОМ останува цврсто на ставот против отворање рудници, затоа што тие се штетни по животната средина и здравјето на луѓето. Последиците од уништувањето на природата и загадувањето од рудниците остануваат присутни со децении по нивното затворање. Не смееме да дозволиме, велат од таму, заради остварување на профит на поединци, да ја уништуваме иднината на сегашните и идните генерации.

-Да се посветиме на развој на зелената економија и отворање зелени работни места, за да обезбедиме здрав и квалитетен живот за граѓаните и просперитет на македонското општество- истакнуваат од ДОМ.

Како што стојат сега работите повторно се отвора пат за реализација на намерите за ископување на злато и бакар во Струмичката котлина. Претходно, Управниот суд ја уважи тужбата на компанијата „Еуромакс Ресоурцес“ против одлуката на Владата да се раскине договорот за една од концесиите, откако Вишиот Управен суд лани, третпат го врати предметот на повторно одлучување. Екологистите велат дека со спојувањето на концесиите и одлуката на Управниот суд, идејата за рудник во земјоделскиот регион, познат по раноградинарското производство, повторно се оживува. Од таму најавуваат дека жителите активно ќе се мобилизираат и самоорганизираат како и дека никогаш нема да дозволат на нивните полиња да се отвори рудник.

Долгогодишната битка на екологистите од „Здрава Котлина“ на крајот на 2019 година личеше на добиена, откако Владата соопшти дека е донесена одлука за раскинување на договорот за концесија. Образложението за ваквиот потег беше тоа што инвеститорот во предвидениот рок не поднел барање со комплетна документација за добивање дозвола за експлоатација на минерални суровини, односно четири години по склучувањето на договорот.

Но, компанијата „Еуромакс“ не се откажа и поднесе тужба против одлуката којашто ја смета за неоснована. Управниот суд во 2021 година донесе пресуда со којашто тужбата ја отфрли како неоснована.

„Еуромакс“ поведе постапка и пред Вишиот управен суд, каде што во февруари годинава беше донесено решение со коешто жалбата на инвеститорот беше уважена и предметот беше повторно беше вратен пред понискиот суд.

Цела работа започна десетина години претходно кога се донесе одлука за експлоатација на рудно богатство од овој регион. Во 2018 година протестите се радикализираа. Тогаш под мотото „Струмица и струмичко против рудникот на смртта“ се одржуваа протестни маршови против отворањето на рудникот за бакар и злато „Иловица-Штука“. Учесниците тврдеа дека нема да дозволат отворање на рудник бидејќи тоа ќе влијае на нарушување на целокупната еко рамнотежа во Струмичкиот регион.