На локацијата позната како „Ловечка“ на 2000 метри надморска височина, Националниот парк „Пелистер“ започна со активности за рушење на објект кој изгоре во пожар во ноември 2021 година.

Од паркот информираат дека изгорениот објект претставувал „долгогодишен ризик по безбедноста на посетителите и често бил користен од несовесни лица за фрлање отпад“.

„Преземените активности се насочени кон обезбедување безбедност на сите минувачи и заштита на природата во паркот“, велат од Националниот парк, без да објаснат како изградбата на дом што го нарекуваат „ловечки“ и оттаму ќе биде наменет за ловџии, во границите на националниот парк – каде ловот е забранет, ќе помогне во исполнувањето на таа цел.

На истата локација наскоро ќе започне изградба на нов објект кој ќе служи за противпожарна заштита, видеомониторинг на видови и поставување на метеоролошка станица. Новиот објект ќе функционира и како модерен шелтер за сите посетители на Националниот парк „Пелистер“.