Aсоцијацијата на спортски обложувалници на Македонија (АСОМ) остро реагира на потегот на Владата, која вчера по предлог на Министерството за финансии ги утврди измените и дополнувања на Законот за игри на среќа и забавни игри, со кои се забранува работата на обложувалниците и казината кои се наоѓаат поблиску од 500 метра од училишта.

Претседателот на АСОМ Васко Илијевски пред Владата најави дека ќе ја известат Европската унија за злоупотреба при носење на новиот Закон за игри на среќа со европско знаменце.

„Прашуваме, дали е вистина дека овој закон за побрзо и без дебата да се протурка ќе биде со европско знаменце по кратка постапка? Владата е должна веднаш да одговори бидјеќи тоа е незаконски и неиздржано според правилата за носење закони со европско знаменце. За ова ќе ја известиме Европката Унија и ќе бараме итно да се повлече законот од носење во таква процедура“, порача Илијевски.

Тој додаде дека Владата „сака преку ноќ и без дебата да донесе закон во нечиј интерес, и дека треба да достави одговори за чии интереси работи“.

„Зошто предлог-законот не е достапен на увид на претставниците на индустријата? Во која демократска и правна држава се носат закони без основна дебата и комуникација со претставниците на таа индустриска гранка? Ние кои сме директно погодени од најавените измени на законот сѐ уште не сме запознаени прецизно што сѐ измените предвидуваат, па со тоа добиваме индикација дека предложените измени намерно и смислено се кријат од нас“, рече Илијевски.

Од АСОМ итно побараа повлекување на предлог-законот и формирање на работни групи помеѓу институциите и приредувачите со цел носење ефикасен и европски закон. Тие упатија апел до претставниците на ЕУ во земјата да побараат увид во овој закон за кој се злоупотребува европското знаменце и посочија дека нема правен основ истиот да се носи под европско знаменце, ниту по скратена постапка, а со тоа да се скрати и дебатата.

На предлогот на Владата реагираше и Асоцијацијата на приредувачите на игри на среќа.

Владата вчера го утврди предлогот на законот за изменување и дополнување на Законот за игрите на среќа и за забавните игри со кои се предлага деловните простории, односно уплатно-исплатните места во кои се приредуваат игрите на среќа да бидат на оддалеченост не помалку од 500 метри од основните и средните училишта.