Критериум за да се добие парична помош за ученици и за студенти е месечните примања во семејството да не бидат повисоки од 50.000 денари. Овој услов создаде недоумица во јавноста – како ќе се собираат податоците за тоа кои се тие домаќинства што ќе го имаат овој праг на месечни примања.

Министерството за образование и за наука (МОН) соопштува дека ќе мора да се аплицира за помошта.

„За начинот на кој учениците и студентите ќе можат да аплицираат, за критериумите, условите и роковите за искористување на овие мерки, Владата и Министерството за образование и наука ќе објават подетални информации во следните неколку денови“, соопшти МОН.

Сепак, направена е пресметка и според неа повеќе од 120 илјади ученици и студенти ќе добиваат месечен паричен надоместок до крајот на тековната учебна, односно академска година. Околу 105 илјади ученици од основните и средните училишта кои потекнуваат од семејства со ниски месечни примања до 50 илјади денари, секој месец во наредните шест, ќе добиваат финансиски надоместок во износ од 1.200, односно 1.800 денари.

Додека, повеќе од 15 илјади студенти што студираат надвор од нивното место на живеење, во следните 7 месеци ќе добиваат ваучери за превоз, односно надоместок во износ од 600 до 1.200 денари.