На тендерот за набавка за електрична енергија за домаќинствата и малите потрошувачи, „ЕВН Хоум“ како универзален снабдувач на регулираниот пазар добил понуда од државната компанија Електрани на Северна Македонија (ЕСМ) со цена повисока за две евра по мегават-час. Актуелната цена е 60 евра по мегават-час, а од 1 јануари 2025 таа би изнесувала 62 евра.

Од цената по која државните електрани ќе ја продаваат својата струја на „ЕВН Хоум“, најмногу зависи какви сметки ќе плаќаат граѓаните од следната година.

И Електродистрибуција вчера на тендер обезбеди струја за покривање на своите загуби, исто така од ЕСМ. Електрани ќе им ја продава електричната енергија по 100 евра за мегават-час, што значи дека просечната цена за загубите во системот ќе биде како и досега.

Според пресметките оваа цена е за 3,3 отсто повисока од сегашните 60 евра за мегават час електрична енергија кои ЕСМ му ги продава на ЕВН Хоум. Понудата на ЕСМ има најголемо влијание врз формирањето на крајната цена за домаќинствата и малите фирми.

Крајниот збор го има Регулаторната комисија за енергетика, која на крајот на годинава треба да го потврди евентуалното поскапување. Претседателот на Комисијата, Марко Бислимовски, во интервју за „Слободен печат“ денеска рече дека се чека да завршат тендерите за набавка на струја, по што ќе биде донесена одлука.

Претходно и премиерот Христијан Мицкоски рече дека не очекува струјата за домаќинствата да поскапе повеќе од 3 отсто.

Во однос на цената на струјата, има дел што го регулира Регулаторната комисија за енергетика и за тој дел таа ќе даде отчет уште наредната недела, но крајниот износ ќе се донесе откако ќе завршат тендерите за купување струја за загуби, како и тендерот за купување струја за домаќинствата и малите фирми од државната ЕСМ.