Помалку од еден месец откако беше отворен во Русија, воено-технолошкиот центар на паравоената група Вагнер во Санкт Петербург бил домаќин на Дамњан Кнежевиќ, водачот на српската ултрадесничарската организација „Народна патрола“, пишува „Радио Слободна Европа“.

„Вагнер“, досега тајновита платеничка група која ги извршуваше „валканите работи“ за русите интереси во војните низ светот, по инвазијата врз Украина отворено регрутира борци кои учествуваат во агресијата против Украина. Приватната компанија која се смета за продолжена рака на Кремљ на 4 ноември отвори центар за воена технологија во вториот по големина руски град.

Групите за човекови права и украинската влада ги обвинуваат членовите на оваа платеничка група – која беше основана пред осум години од руски бизнисмен близок до Кремљ Евгениј Пригожин – за воени злосторства во Сирија и во источна Украина од 2014 година.

Од почетокот на агресијата врз Украина, десничарските организации во Србија гласно ја поддржуваат политиката на Кремљ и се противат на воведувањето санкции против Русија.

Гласни критики од Западот по најавата за руски државен медиум во Србија

Во интервју за Радио Слободна Европа (РСЕ), Дамњан Кнежевиќ изјави дека ова, како и претходните патувања во Русија, ќе донесе „нешто ново“ во неговата организација.

„Народна патрола“, организацијата со која тој раководи, на пошироката јавност и е позната по антиимигрантските акции и организирањето протести за поддршка на Руската Федерација во Белград, откако Кремљ започна инвазија на Украина.

Во видеото објавено на каналите Телеграм на екстремно десничарските групи од Србија и Русија, Кнежевиќ може да се види во модерна зграда направена од челик и стакло.

„Многу мои пријатели ќе се гордеат што имав чест да го посетам центарот „Вагнер“. Тој центар и таа организација се исклучително популарни во Србија“, изјави Кнежевиќ во видеото за руските медиуми. Тоа видео беше објавено на 27 ноември.

Америка сака да ја прогласи руската платеничка група „Вагнер“ за терористичка организација