Од СДСМ прашуваат дали премиерот Христијан Мицкоски ќе побара одговорност од претседателот на Управниот одбор на „Дрисла“ за загадувањето на воздухот во Скопје. Од партијата велат дека се работи за актуелниот советник на премиерот за животна средина и поранешен претедател на Комисијата за животна средина на ВМРО-ДПМНЕ, Даме Димитровски.

„Ќе побара ли сега Мицкоски одговорност од него? ВМРО-ДПМНЕ имаше и директор на Дрисла – Јане Мицевски, човек без никакво соодветно искуство, магистер за туризам и менаџмент“ велат од СДСМ.

Со депонијата „Вардариште“, како што посочуваат, со децении управуваат нивни градоначалници, од Коце Трајановски, до Бобан Стефковски.

„Пред четири години ВМРО-ДПМНЕ и нивните градоначалници ветуваа: „Фабрика за селекција на отпад во Дрисла“,„затворање на Вардариште, намалување на стакленички гасови, покривање и озеленување“, ветуваа „Зелена зона Вардариште“ со спортско-рекреативни терени a Тимчо Муцунски ветуваше дислокација.

Поминаа 4 години ништо од ова не е направено. ВМРО-ДПМНЕ и Мицкоски не само што ништо не исполнија, не само што ништо не решија, туку ги оставија депониите да го трујат градот“ обвинуваат од опозициската партија.

За еколошката катастрофа која секој ден ја живеат скопјани, СДСМ го вперува прстот кон ВМРО-ДПМНЕ.