Лидерот на грчката опозициска партија ПАСОК – Движење на промена, Никос Андрулакис на средбата со претседателката на Грција, Катерина Сакеларопулу изјавил дека ѝ го враќа мандатот бидејќи нема простор за формирање влада.

Киријакос Мицотакис, лидерот на Нова Демократија и Алексис Ципрас, првиот човек на Сириза, претходно исто така го вратија мандатот. Мицотакис, иако победи на изборите со водство од 20 отсто пред Ципрас, не сакаше да формира влада и побара нови избори за да го зголеми бројот на пратеници и да не бара коалициски партнер.

Со доделувањето и на третиот мандат заврши формалниот дел на доделување на мандати за трите првопласирани партии и заврши првиот дел од одредбите предвидени со Уставот.

Претседателката на Грција сега или ќе свика лидерска средба или телефонски ќе разговара со претседателите на партиите во последен обид да се формира Влада со широко мнозинство, што во конкретниот случај ќе биде само формално, за да се запазат процедурите.

Понатаму следи и формирање техничка Влада која ќе има обврска, да ја одведе земјата на нови избори. Мицотакис вчера побара новите избори да бидат на 25 јуни.