Градоначалникот на општина Кисела Вода, Орце Ѓоргиевски, го најави почетокот на изградба на најголемиот ритејл парк, кој ќе биде лоциран во Пинтија, близу Стаклара, на површина од 35.000 квадратни метри.

-Скопје го добива најголемиот ритејл парк, во Кисела Вода. Изградбата на Home Retail Park – првиот ваков трговски парк во Македонија, е проект вреден 15 милиони евра. Ќе обезбеди 20.000 м² модерен комерцијален простор, создавајќи можности за вработување на околу 300 лица и значајно заживување на локалната економија- соопшти тој.

Ѓоргиевски додаде дека со овој капитален проект ќе се отворат 300 нови работни места и дополнително ќе придонесе кон развојот на индустриската зона.

-Home Retail Park ќе биде единствена локација каде што граѓаните ќе можат да најдат сè што им е потребно за својот дом – од мебел, домашни апарати и декорации, до градинарска и бањска опрема. Покрај тоа, ќе располага со модерни кафетерии и ресторани, како и 600 паркинг места за посетителите, создавајќи комплетно шопинг искуство- додаде Ѓоргиевски.

Овој ритејл парк, како што вели градоначалникот, е инвестиција на иднината, која ќе го подобри живеењето на граѓаните и развојот на локалната економија, а неговото отворање е предвидено до крајот на оваа година.