Кина застана на страната на Аргентина: Сји ги отвори незалечените фолкландски рани
Кинескиот лидер изразил писмена поддршка за тврдењето на Буенос Аирес дека Малвините, односно Фолкландските острови како што ги нарекува Британија, ѝ припаѓаат на Аргентина
Кинескиот лидер Сји Ѓинпинг со една изјава го обнови „замрзнатиот“ британско-аргентински територијален спор за Фолкландските острови, за кои двете земји водеа кратка, но крвава војна пред точно четири децении.
Препорачано
Спроти отворањето на Зимските олимписки игри, претседателите на Кина Сји Ѓинпинг и на Аргентина Алберто Фернандез се сретнале во Пекинг, размениле љубезности за „длабокото пријателство“ на нивните земји и потпишале договор за приклучување на Аргентина кон глобалната кинеска инфраструктурна иницијатива Појас и пат. Но, Фернандез потпишал и документ со поддршка на политиката на Пекинг „Една Кина“, која го подразбира и Тајван во нејзина територија, а Сји изразил писмена поддршка за тврдењето на Буенос Аирес дека Малвините, односно Фолкландските острови како што ги нарекува Британија, ѝ припаѓаат на Аргентина.
Шефицата на британската дипломатија Лиз Трас реагираше со порака на Твитер, бранејќи ги Фолкландските острови како „дел од британското семејство“.
– Целосно отфрламе какви било оспорувања на суверенитетот на Фолкландите. Тие се дел од британското семејство и ние ќе го браниме нивното право на самоопределување. Кина мора да го почитува суверенитетот на Фолкландите – порача Трас.
Пекинг возврати со контраобвинување до Обединетото Кралство за лицемерна политика.
– Во ред ли е за Обединетото Кралство со испраќање борбени бродови да го оспорува кинескиот суверенитет во Јужно Кинеско Море? Кина барем не ја испрати својата воена морнарица до Малвините, или како што вие ги нарекувата Фолкландите – коментира новинарот Чен Вејхуа во весникот „Чајна дејли“ на Комунистичката партија на Кина.
Фолкландските острови денес официјално се „британска територија со самоуправа“. Согласно Уставот од 2009 година, островите имаат самостојна влада, која се грижи за основните потреби, освен за одбраната и за надворешните работи, кои се во надлежност на Обединетото Кралство. Британската кралица Елизабета Втора е шефица на државата и индиректно владее претставена од гувернер, кој го поставува на функција извршниот шеф, по совет од Законодавното собрание. Гувернерот Најџел Филипс и извршниот шеф Бари Роуланд заедно ја извршуваат премиерската функција.
Десетнеделната непрогласена Фолкландска војна во 1982 година почна кога Аргентина истовари трупи на островите, на што Британија возврати со моќна борбена флота и десант. По 74 дена војната заврши со предавање на Аргентина, откако загинаа 649 аргентински војници, 255 британски морнари и тројца островјани.
