Севернокорејскиот лидер Ким Џонг-ун изјави дека Северна Кореја набавила ново тајно оружје и постигнала значителен напредок во истражувањето и развојот на одбраната, објави денес државната агенција на земјата KCNA.

„Набавивме ново тајно оружје и постигнавме значителен напредок во истражувањето и развојот на одбраната, што во голема мера ќе придонесе за понатамошни пробиви во нашата воена моќ. Нашата партија и влада исто така континуирано и брзо напредуваат во зајакнувањето на одбранбените капацитети на нашата земја“, рече Ким за време на своето обраќање пред Врховното народно собрание.

Според него, Северна Кореја ја зајакнала својата поморска моќ со создавање разорувачи со повеќе намени.

Ким, исто така, рече дека веста за херојството на севернокорејските војници кои учествувале во операцијата за ослободување на Курската област во Русија предизвикала бран патриотски чувства и масовен бран на добротворност за семејствата на повредените, пренесува РИА Новости, повикувајќи се на севернокорејските државни медиуми.

„Откако беше пренесена херојската слава на нашите војници од прекуокеанските оперативни единици кои учествуваа во операцијата за ослободување на Курската област на Руската Федерација, масовниот хероизам почна да преовладува низ целото општество, а меѓу младите мажи и жени се појави невидена желба за запишување во армијата“, заклучи севернокорејскиот лидер.