Севернокорејскиот лидер Ким Џонг-ун им додели одликувања на припадниците на севернокорејските трупи кои се бореле за Русија во војната против Украина, објави денес државната новинска агенција КЦНА.

Во своето обраќање, Ким рече дека „борбените активности на прекуокеанските оперативни сили“ ја докажале моќта на „херојската“ севернокорејска армија и дека „ослободувањето на Курск“ го докажало „борбениот дух на хероите“, според Ројтерс.

Ким положи цвеќе на спомен-ѕидот за војниците кои загинале во странство, по што се одржа концерт за војниците кои се вратиле од Русија, како и банкет на кој присуствуваа членови на семејствата на загинатите.

Овие потези се најновите јавни почести на севернокорејските трупи кои се бореле во Русија.

Околу 600 севернокорејски војници загинале борејќи се за Русија против Украина од вкупно 15.000 распоредени, соопштија јужнокорејските пратеници во април, повикувајќи се на разузнавачката агенција на земјата.