Фудбалската репрезентација на Словенија за прв пат во својата историја се пласираше во нокаут фазата на едно големо натпреварување. Селекцијата предводена од Матјаж Кек го освои третото место во групата Ц на ЕП, зад Англија и Данска, а пред Србија која го заврши настапот на овогодинешното Европско првенство.

Англија заврши на врвот во групата со пет бода, а меѓу Словенија и Данска кои освоија по три бода, на крајот пресуди критериумот подобри резултати во квалификациите и така Данците завршија на второто место и ќе се сретнат против домаќинот Германиај во осминафиналето. Англичаните и Словенците денеска ќе дознаат кои ќе им бидат противниците.

По бодот против Англичаните, Кек ја искористи приликата да ја потсети јавноста дека уште пред ЕП верувал во успехот на својот тим:

„Можеби некој ќе се сети што кажав по ждрепката: само нека се смеат. Честитки за момците и целиот тим. Дури и медиумите додаваа свое за да бидеме уште помотивирани и лути, а во гневот секогаш имаме квалитет“.

Да потсетиме, пред ЕП тој изјави: „Ни претстојат многу предизвици. Без разлика на тешките противници, јас водам тим на ЕП што сака да постигне позитивен резултат. Од една страна, јас сум во ред со фактот дека не сме фаворити. Видов дека некои луѓе се смееја кога ја добија Словенија, можеби ќе им биде жал. Ќе направиме сѐ за да биде така“.