Откако неколку од угостителските објекти лоцирани на Кеј „13 Ноември“ со денови узурпираат дел од шеталиштето со маси и столици на кои ги услужуваат гостите на отворено, надвор од застаклените тераси и без дозвола од Град Скопје, денеска на терен излегоа инспекторите на Општина Центар и извршија вонреден инспекциски надзор на овие локали.

Притоа, како што тврдат од Општината биле изречени казни за сите правни субјекти кои ги узурпираат јавните површини со поставување урбана опрема без соодветно одобрение. Кои точно угостители биле казнети и со колкава глоба во соопштението на  Центар не се прецизира, иако граѓаните точно знаат каде можеа да пијат кафе деновиве надвор од локалите – во „Торос“, “Бела Виста“ и во „Соул кичен“. Од Општината не објаснија ни дали на угостителите им било наложено веднаш да си ги приберат масите во застаклените тераси.

Градоначалникот на Општина Центар, Горан Герасимовски вели дека ваквите инспекциски надзори ќе се интензивираат во наредниот период и дека нема да се толерира незаконско и бесправно поставување урбана опрема. Тој соопшти дека на денешната средба со угостителите од општината се дискутирало токму за овој проблем, но и за хигиената и гласната музика.

Проблемите со одлагањето на сметот, гласната музика во доцните часови и непочитувањето на правилата за урбаната опрема беа главните теми на средбата. Со доаѓањето на потоплите денови, се зголемува движењето на граѓаните и посетителите во угостителските објекти, па затоа е важно навремено да укажеме дека законите мора да се почитуваат, истакна Герасимовски.

Додека инспекторите се во „зимски сон“, летните тераси го запоседнаа Кејот

Посебен акцент било ставен на управувањето со отпадот, при што градоначалникот посочи дека голем дел од отпадот потекнува од угостителските објекти. Во таа насока, согласно Законот за животна средина, угостителите добија рок до 1 април за склучување договори со овластени постапувачи за третирање на таков вид отпад.

Теренските контроли ќе продолжат, но мора да делуваме и превентивно. Не започнуваме веднаш со казнени мерки, но по 1 април, секое непочитување на законот ќе биде соодветно санкционирано, порача Герасимовски.

Дали со денешната контрола на општинските инспектори и со изречените казни ќе се спречи самоволието на угостителите, скопјани ќе можат да видат уште утре доколку времето е сончево.

Вчера од Град Скопје за „Слободен печат“ информираа дека тие не дале одобрение за поставување урбана опрема надвор од локалите.

Ве известуваме дека Град Скопје нема дадено Одобрение за поставување маси пред застаклените тераси. Инспекторатот на Град Скопје секојдневно постапува со санкционирање на противправно поставување, но бидејќи Град Скопје е единствена единица на локална самоуправа во Македонија која нема градежна инспекција, во согласност со закон за отстранување незаконски поставена урбана опрема има Општина Центар – тврдат од Град Скопје.