„Бајненс“ ги напушта плановите за стекнување на Еф-Ти-Екс (FTX), објави компанијата, оставајќи ја крипто-империјата на Сем Банкмен-Фрид на работ на колапс. Пресвртот доаѓа еден ден откако извршниот директор на „Бајненс“, Чангпенг Жао, објави дека најголемата светска компанија за криптовалути постигнала необврзувачки договор за купување на не-американски компании на Еф-Ти-Екс за непознат износ, спасувајќи ја компанијата од криза со ликвидност. Претходно оваа година, приватните инвеститори го проценија Еф-Ти-Екс на 32 милијарди долари.

„Првично, се надевавме дека ќе можеме да ги поддржиме клиентите на Еф-Ти-Екс за да обезбедиме ликвидност“, соопштија од компанијата.

„Но, проблемите се надвор од нашата контрола или можност да помогнеме“.

Соочен со криза на ликвидноста, Банкмен-Фрид се обиде да собере пари од ризични капиталисти и други инвеститори пред да оди во Бајненс, наведуваат извори запознаени со ова прашање. Жао првично се согласи да се вклучи, но неговата компанија брзо го промени својот став, наведувајќи го извештајот за „неприсвојување на средства на клиентите и наводни истраги од американските агенции“.

Не е јасно кој е следен на ред да ја купи „болната“ крипто берза. Банкмен-Фрид им кажа на инвеститорите дека компанијата се соочува со недостиг од 8 милијарди долари поради барањата за повлекување и има потреба од итно финансирање, вели лице запознаено со ова прашање.

Колапсот на договорот Бајненс – Еф-Ти-Екс е последното поглавје од шокантниот колапс што го потресе светот на криптовалутите оваа недела. Банкмен-Фрид само се обиде да ги увери инвеститорите во понеделникот дека средствата на компанијата се во ред. Но, откако Жао од Бајненс јавно кажа дека неговата компанија го продава својот удел во оригиналниот токен на Еф-Ти-Екс, започна распродажбата и тие не можеа да сторат ништо за да го спречат.