Општина Тетово ќе одвои 40.000 евра за таканаречената албанска академија на науките и со тоа е прва од четирите општини со кои раководат градоначалници од владејачката Вреди кои финансиски ќе го помогнат функционирањето на паралелната институција. Ова вчера во изјава за медиуми го најави тетовскиот градоначалник Билал Касами и еден од предводниците на Вреди. Финансирање на албанската академија најавија и градоначалниците на Чаир, Гостивар и на Желино, но досега не објавија колку пари ќе одвојат од општинските буџети.

Поддршка за албанска академија на науките и уметностите следи откако четирите лидери на Вреди Касами, Изет Меџити, Арбен Таравари и Зеќирие Ибрахими одржаа две средби со „Академското здружение за наука и уметност на Албанците“.

-Врз основа на прелиминарен договор меѓу академијата и четирите општини кои ја презедоа одговорноста за финансирање, се договоривме општина Тетово да ја поддржи со околу 40.000 евра -изјави Касами.

Против паралелна академија се изјаснија владините партнери ВМРО-ДПМНЕ и ЗНАМ, опозициските СДСМ и ДУИ како и Македонската академија на науките и уметностите (МАНУ).

Премиерот Христијан Мицкоски изјави дека иднината не е во поделби, туку во обединување и дека МАНУ е институцијата за развивање на науката и уметноста.
Од Академијата порачаа дека отсекогаш биле отворени за сите граѓани што ги исполнуваат високите научни и уметнички критериуми за членство во неа, независно од етничката, верската и каква било друга припадност, и дека за политичките партии и нивните влијанија никогаш немало место во МАНУ. Академијата нагласува дека во Македонија, како и во земјите од регионот и насекаде во светот, постои само една национална академија која ја претставува државата во европската и во други меѓународни асоцијации на академии.

Според „Академското здружение за наука и уметност на Албанците“, неопходноста од создавање албанска академија е инертноста на МАНУ за реформи што треба да ја одразуваат фактичката состојба, а не се случуваат веќе 57 години.

-Овој исклучиво научен проект на Вреди нема за цел да предизвикува етнички тензии ниту паралелизам во државната образовна номенклатура, туку да изградиме уште една научна установа, која ќе ја обедини автентичната албанска мисла во заеднички и рамномерен општествен развој – соопштија од Здружението по последната средба.