Општина Карпош годинава за прв пат објавува јавен повик за избор на најдобро уреден училишен двор или дел од дворот. Станува збор за зони во дворовите изведени од еко – материјали, кои поттикнуваат креативност кај учениците, но и поголема свест за заштита на околината и кои за време на пандемијата, овозможија дел од наставата да се одвива на отворено.

Од Карпош информираат дека право на учество на јавниот повик имаат сите десет основни училишта. Дополнителни поени при рангирањето ќе се добиваат доколку во состав на зоните е засадено зеленило, цвеќиња или да се поставени корпи за отпадоци и рециклирање, како и опрема за спорт и рекреација.

– Овие делови од училишните дворови, во голема мерка беа креирани со заеднички напори на наставниците, учениците и родителите. Затоа ги охрабруваме сите чинители, заедно да ја подготват проектната апликација и да конкурираат за награди од 50.000 денари за прво место, 30.000 денари за второ место и 20.000 денари за трето место – велат од Карпош.

Оттаму додаваат дека постапката за избор на најдобро уреден еко-училишен двор на основните училишта на територија на Општина Карпош за 2022 година ќе ја спроведе комисија, формирана од градоначалникот Стевчо Јакомовски, според критериуми кои се наведени во јавниот повик.

Училиштата можат да се пријават на конкурсот до 26 април.