Редакцијата на емисијата „Код“ е една од новинарските редакции кои во изминатите години истражуваше за сомнителните набавки на мазут во земјава, поради кои денес е уапсен бизнисменот Ратко Капушевски и неговиот бизнис-партнер, како и сопственикот на компанијата „Пуцко петрол“, Асмир Јахоски. Со истрагата е опфатен и поранешниот директор на државната ЕСМ, Васко Ковачевски, кој од претходно е избеган од државата.

Новинарката Снежана Лупевска Созен, која предводеше едно такво истражување објавено во јануари 2023 година за милионскиот тендер за мазут, вечерва на „Фејсбук“ откри што напишал Капушевски во реакцијата кога била објавена приказната.

„Ако јас не носам мазут, нема да има струја, а ако нема струја, ти не можеш да одиш на фризер да се исфенираш за на емисија“, напишал тогаш бизнисменот, поранешен функционер на ВМРО-ДПМНЕ и директор на Спортскиот центар „Борис Трајковски“.

„Ние ја продолживме истрагата без оглед дали сме фенирани или не, а таа истрага, благодарение и на наводите од истрагата и на тогашните антикорупционери, заврши во ОЈО ГОКК, кое сега постапува со асистенција на МВР“, пишува Лупевска во објавата.

Уапсен е бизнисменот и поранешен државен директор Ратко Капушевски