Еурофарм Пелистер во саботата потешко од очекувањата и со многу проблеми славеше во домашното првенство против Пролет, а сега битолчани ги чека дуелот против дански Архус.

Тренерот Ларс Валтер е свесен дека „пелистерци“ мораат подобро од дуелот со пролет ако сакаат триумф против данскиот тим. Капитенот Мирко Радовиќ исто така порача дека добро знаат каков противник ги очекува утре.

„Добро се подготвуваме, направивме видео-анализа. Знаеме каква екипа ни доаѓа. Играат добро тимски, брзо се движи топката, тоа е таа данска школа на ракомет. Многу брзо играат, трчаат брз центар… Немаме многу време за подготовка, но ние знаеме каква екипа сме и што можеме. Во оваа атмосфера мислам дека имаме шанси и тоа ќе го покажеме во вторник. Ќе видиме колку ни одговараат со стилот. Во овој прв дел од сезоната немавме можност да се сретнеме со екипа која игра таков атомски ракомет. Но, мислам дека треба да се грижиме повеќе за нас и нашата игра. На нашата игра е акцентот. Во оваа атмосфера имаме што да покажеме и гледачите ќе уживаат како и на секој европски натпревар во Битола. Да покажеме каква екипа сме кога играме на домашен терен“.

Натпреварот помеѓу Еурофарм Пелистер и Архус се игра утре во салата „Боро Чурлевски“ од 20:45 часот.