Италијанската фудбалска легенда, Фабио Канаваро, засега останува без нова работа, иако неодамна добил понуда повторно да стане селектор.

Како што пренесуваат медиумите, поранешниот дефанзивец на „азурите“ повторно бил посакуван од фудбалската федерација на Кина, која веќе еднаш му ја довери репрезентацијата во 2019 година. Тогаш Канаваро го водеше националниот тим на Кина на две контролни средби против Узбекистан и Тајланд и двете ги загуби со по 1-0.

Иако не се прослави како селектор, Канаваро остави силен впечаток во кинескиот клупски фудбал, особено како тренер на Гвангжу, каде што помина неколку успешни сезони.

Сепак, според информациите, желбата на Канаваро е да остане во Европа и да продолжи во клуб од „стариот континент“. Неговиот последен ангажман беше во Динамо Загреб, каде што на клупата мина 14 натпревари, со биланс од седум победи, две ремија и пет порази.

Преземено од: Спорт.ком.мк