Веќе неколку години, легендарната Цибона – симболот на загрепската и европската кошарка – се наоѓа на самиот раб на финансиски колапс. Двократниот европски шампион, клубот кој изнедри кошаркарски великани, денес е сенка на славното минато и постојано се соочува со опасност од ставање клуч на врата.

Но како што пишуваат хрватските медиуми, Виктор Додиг, влијателен и респектиран банкар од Канада со хрватски корени, е сериозно заинтересиран за преземање на Цибона. Со тоа, двократниот европски шампион конечно би можел да добие свеж капитал и стабилни финансиски темели за враќање кон спортската елита.

Додиг е претседател на Управниот одбор на моќната CIBC Bank во Торонто веќе повеќе од една деценија. Со клубот е поврзан преку Абрахам Мишетиќ, кој неодамна е избран за член на Собранието на Цибона, а локалните медиуми јавуваат дека канадскиот банкар веќе уплатил половина милион евра за покривање на дел од долговите и финансирање на подготовките за новата сезона.

Потенцијалниот сопственик е роден во Торонто, откако неговите родители Веселко и Јања емигрирале во Канада во 1961 година. Се образувал на престижниот Харвард, и важи за строг, прагматичен, но и визионерски бизнисмен кој знае како да трансформира проблематични организации во успешни приказни.

Се очекува Цибона наскоро да се трансформира во акционерско друштво, при што мнозински сопственик би станал токму Додиг. Последната титула во хрватското првенство Цибона ја освои во 2013 година, додека пак во сезоната која следи, „Волците“ ќе настапуваат во АБА 2 лига, односно во вториот ранг на регионалниот шампионат и првпат во својата историја, нема да биде дел од елитната АБА-лига.