Канадското надзорно тело за дискриминација започна истрага за наводите дека „Најк Канада“ и една компанија за ископување злато користеле присилни ујгурски работници во нивните фабрики во Кина. Истрагите произлегуваат од жалбите поднесени од коалицијата на групи за човекови права, пренесува „Би-Би-Си“.

„Најк“ соопшти дека тие повеќе немаат врски со компаниите обвинети за принудна работа на Ујгурите. „Династи Голд“ објави дека овие наводи се појавиле откако го напуштиле регионот.

Извештајот на Обединетите нации во 2022 година покажа дека Кина извршила „сериозни прекршувања на човековите права“ против Ујгурите, етничко муслиманско малцинство кое живее во регионот на Ксинџијанг, што „може да претставува меѓународно злосторство, особено злосторства против човештвото“. Пекинг ги негира обвинувањата.

Ова е прва ваква истрага објавена од страна на канадскиот омбудсперсон за одговорно претпријатие (Кор) откако го започна својот механизам за жалби во 2021 година.

Агенцијата тврди дека „Најк Канада“ има врски со снабдување со неколку кинески компании кои австралиски тинк-тенк ги идентификувал дека користеле или имале корист од присилната работа на Ујгурите.

Во 2020 година, тинк-тенкот, Австралискиот институт за стратешка политика (АСПИ), објавил извештај во кој се проценувало дека над 80.000 Ујгури биле префрлени да работат во фабрики низ Кина.

Во извештајот се вели дека компанијата не презела „никакви конкретни чекори за да се обезбеди надвор од разумно сомневање дека принудната работа не е вмешана во нивниот синџир на снабдување“.