Канада планира да ја признае палестинска држава во Обединетите нации во септември, објави премиерот на земјата. Марк Карни им рече на новинарите дека планираниот потег зависи од одредени услови – вклучително и обврска на Палестинската самоуправа радикално да ја реформира својата влада и да одржи општи избори во 2026 година на кои Хамас нема да може да игра никаква улога.

„Канада долго време е посветена на решение со две држави, независна, одржлива и суверена палестинска држава што живее рамо до рамо во мир и безбедност со Државата Израел“, рече Карни, придружуван од министерката за надворешни работи Анита Анад.

„Канада има намера да ја признае Државата Палестина на 80-то Генерално собрание на Обединетите нации“, рече Карни. „Ние имаме намера да го сториме тоа затоа што палестинската власт се обврза да ги води потребните реформи, а исто така се обврза да не ја милитаризира државата Палестина“, додаде Карни.

Канадскиот премиер, исто така, рече дека „го осудува тоа што Израел дозволува да се случи катастрофа во Газа“.

Соопштението на канадскиот премиер следува по разговорот што го имаше претходно со Махмуд Абас и следува по слични обврски од други земји.

Израел ја осуди намерата на Канада

Израелската дипломатија ја осуди намерата на канадската влада да ја признае палестинската држава, опишувајќи ја најавата дадена од премиерот Марк Карни малку порано како дел од „перверзна кампања за меѓународен притисок“ што ќе „ја зацврсти позицијата на Хамас на преговарачката маса во критичен момент“.

„Признавањето на палестинска држава во отсуство на одговорна влада, функционални институции и влада со добри намери“ е еднакво на „наградување и легитимирање на монструозното варварство на Хамас на 7 октомври 2023 година“, се вели во соопштението на израелската амбасада во Отава.

Франција ја поздрави одлуката на Канада

Француското претседателство ја поздрави намерата на Канада да признае палестинска држава за време на Генералното собрание на ОН во септември и увери дека ќе „продолжи со своите напори“ за да се осигури дека и другите држави ќе го сторат истото.

„Воодушевени сме што имаме можност да соработуваме со Канада за да дадеме нов импулс на перспективата за мир во регионот на Блискиот Исток“, се вели во Елисејската палата.

„Ќе продолжиме со нашите напори за да можат и другите земји да учествуваат во оваа динамика  пред Генералното собрание“, се продолжува во соопштението во кое се додава и дека францускиот претседател Емануел Макрон разговарал со канадскиот премиер Марк Карни „малку порано“ вчера за ова прашање.