Ние во овој период имаме пристап до европските претпристапни фондови, т.н. ИПА-фондови. Во изминатите 10 години се искористени некаде околу 35 милиони евра. Со европски пари се реконструирани граничните премини Табановце, Ќафасан и Блаце. Сега сме во процес на отворање на граничен премин во Маркова Нога и Делчево. Европските парични средства за нас значат можност за побрз проток на стоките и на патниците.
Ова во интервју за Рацин.мк го изјави Златко Ветеровски, помошник директор во Царинската управа на Северна Македонија. Тој додаде дека ЕУ го нуди концептот на т.н паметни граници, односно во иднина со новиот компјутеризиран транзитен систем стоките ќе влегуваат во ЕУ со т.н кјуар-код, што ќе може да се чита од мобилен. Со прикажување на овој код камионот со стоки ќе може да влезе во некоја земја што е членка на ЕУ.

– За компаниите, погодноста е тоа што тие немаат никакви давачки во поглед на увозот кон Европската Унија, со процесот на овластен економскиот оператор и постапката за меѓусебно признавање со ЕУ ќе биде овозможено оние компании што имаат статус на доверливи компании, кои што е докажано дека ги почитуваат прописите од ЕУ, исто така, да не бидат подложени на никакви дополнителни контроли. Целта е што побрзо да се транспортираат стоките во период на енергетска, па и транспортна криза. Ние сме први соседи на ЕУ, тоа за компаниите ќе значи многу поголеми можности за нови пазари, за нови купувачи и за поголем економски раст и развој – заклучи Ветеровски.