Повеќе од три децении, уметничките и животните патишта им се вкрстуваат во еден ретко успешен сценски израз, во креативна уметничка сеанса во која и виолината/виолата и пијаното се надополнуваат со неверојатна компатибилност, категоризирајќи го камерното дуо Љубиша Кировски – Маја Шутевска-Кировска во супериорните камерни формации на македонската музичка сцена.

Со концерт во Фоајето на Националната опера и балет Дуо Кировски, односно Љубиша Кировски и Маја Шутевска-Кировска на 15 декември одбележаа 30 години заедничко музицирање. Високото уметничко и изведувачко ниво го потврдија и на славеничкиот концерт.

– Да се опстои и функционира на концертната сцена 30 години во ист состав само по себе е голем успех и редок случај, дури и во светски рамки. Нашето заедничко музицирање започна за време на студентските денови и нашиот прв концерт беше на фестивалите „Скопско лето“ и „Охридско лето“. Треба навистина да ја сакаш оваа професија и да ја работиш со љубов, за да има успех. Ние бевме желни за учење нови композиции, за усвојување нови знаења (престој на „Европската Моцарт академија“ и усовршување за дуо сонати во Лозана, Швајцарија, како и освојувањето на Специјалната награда во Трст, Италија) кои ни отворија сосема нови погледи и размислување како уметници. Во годините коишто следеа како уметници бевме комплетно посветени на нашиот професионален развој, многу истражувавме и поставивме многу премиерни сонати и дела од светски и македонски композитори, не само на нашата концертна сцена, туку и на нашите гостувања надвор од Македонија.

Секако сето тоа придонесува за голема сигурност и взаемна доверба помеѓу уметниците, затоа што еден ансамбл претставува еден организам кој несомнено функционира заедно со меѓусебна доверба, почит и повеќечасовно заедничко вежбање. Во годините на заедничкото музицирање ние созреавме, пред себе поставивме високи стандарди и критериуми, кои на секој концерт ги надградувавме. Бидејќи имаме слични музички сензибилитет и вкус, секако дека покрај „железниот“ дуо репертоар, кој на секој наш концерт го негуваме, идеите за програма се заеднички и на тој начин се надополнувавме како уметници и секогаш тежнееме да дадеме печат и автентичност на финалниот производ – едногласно истакнуваат Љубиша и Маја.

Покрај заедничкото музицирање, Љубиша Кировски и Маја Шутевска-Кировска се брачен пар и едновремено треба да се грижат и за секојдневните обврски што ги носи животот.

– Секако дека заедничкиот живот на двајца уметници сам по себе е голем предизвик. Иако меѓусебно се разбираме и знаеме колку посветеност е потребна секојдневно за да се биде успешен, сепак, тука се и секојдневните обврски. Покрај нашата комплетна реализираност како уметници, ние сме реализирани и како родители. Нашите две ќерки, Александра и Бисера, растејќи во музичко семејство тргнаа по нашиот пат и веќе се многу успешни. Во семејство каде што живеат и секојдневно работат четворица инструменталисти е малку комплицирано да се направи организација на секојдневните обврски. Еден мора да биде организатор, во случајот тоа е Маја, а за секојдневните обврски главно се договараме, но секогаш сѐ е во функција на завршување на професионалните задачи (секојдневно вежбање). Посебно разграничување помеѓу професионалните и секојдневните обврски нема, а се организираме во зависност од слободното време – објаснува Љубиша Кировски.

Двајцата се педагози, активни учесници во концертниот живот, но и ангажирани во СМУМ, а веќе три години го организираат и „Лешочкиот камерен музички фестивал“. Се чини дека целиот живот им е посветен на музиката.

– Покрај заедничката концертна активност, ние сме и професори, во ДМБУЦ и на ФМУ. Секако, искуството како уметници многу ни значи во нашата педагошка дејност. Љубиша веќе 10 години е претседател на СМУМ и учествува во организацијата и реализацијата на сите активности во Сојузот, а тоа се фестивалот „Златна лира“ и циклусот „Про музика“. Од нашето долгогодишно искуство како концертни уметници кои настапуваат во странство, забележавме дека многу фестивали се организираат на необични, планински, егзотични места кои се од особено културно значење за регионот, како Вербиер во Швајцарија и многу фестивали во Италија, Франција, Германија и Скандинавските земји. Така дојдовме на идеја да организираме еден ваков фестивал и во Македонија. Тоа е „Лешочкиот камерен музички фестивал“ во Лешок, како место со посебно културно и историско значење и кој веќе три години успешно се реализира.

Секојдневието во нашето семејство е посветено на музиката, тоа го наметнуваат нашите секојдневни професионални обврски како уметници, педагози, организатори на музички настани. Се трудиме да балансираме помеѓу професионалните и семејните обврски и, секако, како уметници со нашето искуство да им помогнеме во професионалниот развој на нашите ќерки, да ги научиме пред себе секогаш да поставуваат високи цели, и пред сѐ, да им ја развиеме љубовта кон професијата, затоа што музиката не е само професија, музиката е начин на живот. Животот посветен на музиката станува музика затоа што оваа уметност облагородува и само ако се работи со љубов и задоволство таа има неверојатна моќ да го облагороди духот на човекот и да го пренесе во несекојдневна интелектуална, префинета состојба – посочува Маја Шутевска-Кировска.

(Текстот е објавен во „Културен печат“ број 210, во печатеното издание на весникот „Слободен печат“ на 23-24.12.2023)