Бизнисменот Орце Камчев, еден од обвинетите за случајот „Плацеви на Водно“ во судницата одговараше на прашањата од обвинителката Лиле Стефанова и откри дека експремиерот Никола Груевски, кој е обвинет во случајот но е во бегство, ги заменил плацевите на Водно со три станови со површина од 750 м2 на атрактивна локација на Водно.

Камчев сведочеше дека морал да го купи земјиштето  на „Сирах инженеринг“ на Водно, купено во име на Груевски, затоа што се плашел од одмаздољубивоста на Груевски.

Зборувајќи детално за зделките кои се направени во тој период, Камчев рече дека до 2015 година не слушнал за Сирах но преку Мијалков и Ненад Јосифовиќ и својата сестра добил сигнал дека тоа земјиште кое било на Груевски треба да го купи.

– Преку сестра ми прати порака една локација да се задржи, а другите, кои не вределе, да се размисли да се надомести во соодветен адекватен имот. Тоа беше првиот договор во 2015 година. Потоа Груевски се откажа комплетно од сите плацеви, побара адекватни станови. Пошто требаше да се затвори целата трансакција, сите плаќања од Орка кон Сирах лимитед и така натаму, се направени комплетно така како што обвинителството ги има напишано. По барање на Груевски, плацевите се компензираа со станови на атрактивна локација од 750 метри квадратни. Пошто требаше некако да се обезбеди преносот, во 2015 од негова страна фирма влезе како соосновач во зградата во која се градеа становите. Не сакам да кријам сопственост, а најмалку на Груевски. Потоа фирмата требаше да го врати уделот, а потоа да земе за таа вредност станови кога ќе се добијат имотните листови. Првата трансакција беше во 2016 година, а првиот имотен лист во 2020 година. Ова е вистината за делот што сум обвинет, рече денеска Камчев во судницата.

Запрашан од обвинителката каде се становите кои ги добил Груевски, Камчев рече:

– Во зградата Панорама резиденс, три апартмана во квадратура од 750 метри квадратни. Не се под хипотека, се чуваат за примопредавање. Ги чува Мето Стојчевски. Знам дека се за Никола Груевски, тоа е јас што знам, одговори Камчев.

Пред денешното сведочење на Камчев, свои искази за „Плацевите на Водно“ дадоа и обвинетиот Ристо Новачевски, инаку кум на Груевски кој по налог на експремиерот во 2012 година ја основал фирмата ,,Сирах инжинеринг“ и обвинетиот Ненад Јосифовиќ, адвокат на Камчев.

Случајот „Плацеви на Водно“ се однесува на плацевите купени од поранешниот премиер Никола Груевски на Водно за 1,2 милиони евра – пари, според обвинението, украдени од членарините уплаќани од членовите на ВМРО-ДПМНЕ.

Според обвинението, овие пари Груевски потоа ги испрал со помош на сообвинетите: Јордан Камчев, Сашо Мијалков, Ристо Новачевски, Ненад Јосифовиќ и мајката на Орце Камчев – Ратка Куновска Камчева.

Како Груевски преку посредник ја добил фирмата „Сирах Лимитед”