Новиот закон за Судски совет кој го изработи широка работна група за реформа на Судскиот совет врз основа на препораките на Оценската мисија на ЕУ веќе е готов, прикачен на ЕНЕР и достапен на јавноста. Препораките беа бројни и се однесуваа делумно на измени на Законот а делумно на уставни промени кои треба да ја зајакнат улогата на Судскиот совет како независно судско тело кое треба да ја гарантира самостојноста и независноста на судството, потсети академик Владо Камбовски кој раководеше со подготовката на новиот законски текст.

-Препораките се однесуваа околу одговорноста на членовите на Судскиот совет и постапките за нивна нивна дисциплинска одговорност, постапката на нивно разрешување, избор на членовите и тоа помалку од редот на судиите и повеќе од редот на членовите коишто ги избира Собранбието и по предлог на Претседателот на државата. Мислам дека предложените решенија во се се поклопуваат по сугестиите на Оценската мисија. Петте члена што ќе се избираат во Собранието треба да бидат од редот на универзитетските професори по право, адвокати и други истакнати правници, што не е случај со постојниот Судски совет и второ да се избираат во постапка аналогна на изборот на членови на ДКСК. Сепак во препораките немаше мислење дека постојниот Судски совет треба да се разреши, нагласи Камбовски.

Во однос на идејата за разрешување на целиот Судски совет која беше презентирана во текот на кампањата за парламентарни избори од сега владејачката партија ВМРО-ДПМНЕ, Камбовски посочи треба да се има предвид дека во Советот има две структури.

-Има доминација на членови од редот на самите судии и на тој начин е даден поширок простор за фактички за активност на тоа тело за заштита на независноста и самостојноста на тоа тело. Значи самите судии кои се во мнозинство треба да во прв ред да се загрижени или заинтересирани, обврзани да ја заштитуваат сопствената независност, непристрасност и самостојност и од друга страна состав од 5 членови овозможуваат сепак да не дојде до некоја авторитарна позиција на самите судии во однос на судскиот систем туку да се овозможи и извршната власт, тоа е претседателот, односно Собранието да имаат допир, увид за постапување на извршната власт, собранието во поддршка на независноста и самостојноста на судството. Затоа е така компониран Судскиот совет. Ако е составен само од судии води кон едни опасности. Начелото на поделба на власта гарантира самостојност на трите власти, но и заемна координација и влијание. Исто така треба да изнајде механизми како да оневозможи преку овие членови на Судскиот совет кои ги избира Собранието да не дојде до активни, живи, непосредни политички или партиски влијанија врз работата на Советот, што сега ни се случуваше, објасни Камбовски.

Оттаму, вели тој, не е едноставно разрешувањето на Судскиот совет со Закон, големо прашање е дали така може уставните тела да бидат разрешувани со обични закони, а тука го има разнородниот состав што ќе значи поголемо мешање во судската власт односно во автономното право на судиите да ги избираат своите членови во Судскиот совет.

-Ако го разрешите целиот Судски совет не ја исклучувате можноста повторно тие судии да бидат избрани за членови на Судскиот совет освен ако со законот не им се забрани повторно да бидат именувани што е правно неиздржано. Фокусот сега треба да се насочи во рамки на оние предложени решенија за зајакнување на одговорноста на членовите и процедурите што се таму предвидени за обезбедување на објективизирани до крај постапки за избор на членови, транспарентност, одговорност, отчетност на работата на Судскиот совет т.е. подигање на неговите капацитети што не исклучува можност, по однос на членовите кои ги избира Собранието, тоа во секое време да го покрене тоа прашање. Законот обезбедува механизми како може не само самото Собрание, туку и други иницијатори на таа постапка да доведат до одговорност и  разрешување на член на Судскиот совет, рече Камбовски.

Тој потсети дека во претходниот период фактички членовите на Судскиот совет имале неверојатен имунитет и тоа тело не одговарало пред никого и де факто, а процедурите на покренување на постапки, иницијативи за утврдување на одговорност и разрешување не беа законски добро уредени.

-По мое мислење затоа треба да се оди по тој пат, да не се пребрзува со некои такви решенија. Се сеќавате дека на почетокот на онаа претходна влада имаше најава дека ќе дојде до генерален реизбор на сите судии. Лесно е да ги разрешите сите, но проблемот е после каде и како на кој начин ќе ги изберете оние кои треба да бидат на тие места, изјави Камбовски пред почетокот на завршната конференција на проектот „За правда – Граѓанските организации за независно и ефикасно правосудство“.