Темпераментниот Австралиец Ник Кирјос планира да се врати на тенисот во Абу Даби во декември со цел да освои грен-слем и да ги замолчи оние кои се сомневаат во него.

Некогашниот светски рекет број 13 одигра само еден меч во сингл во две години, откако се здоби со повреди на коленото, стапалото и зглобот.

Австралиецот (29) неколкупати навести дека ќе се пензионира, но во понеделникот изјави дека ќе направи камбек на Светската тениска лига во декември, пред да се појави на Австралија опен во јануари.

– Се враќам бидејќи нешто ме влече во тенисот. Го победив речиси секој тенисер што се најде пред мене, влегов во финале на грен-слем, освоив титула во двојки на грен-слем, освоив повеќе титули и заработив пари. Но, мислам дека единственото нешто што сега ми е на мета е грен-слем титула. Мислам дека тоа ќе биде единственото нешто што ќе ги замолчи критичарите. Тоа ќе биде мојата длабока мотивација – вели Кирјос.

Тој работеше како коментатор за време на отсуството, а стигна до своето прво грен слем финале во сингл на Вимблдон во 2022 година, губејќи во четири сета од Новак Ѓоковиќ.

Тој никогаш не стигна да оди подалеку во ера во која доминираа Ѓоковиќ, Рафаел Надал и Роџер Федерер.

Но, со оглед на тоа што Надал го објави своето пензионирање минатата недела, а Ѓоковиќ сега има 37 години, Кирјос верува дека сега е неговата шанса да дојде до титула на грен слем турнир.

Ѓоковиќ: Резултатски ова беше една од моите најлоши сезони