Нашата помош е дел од зголемената воена соработка меѓу Европската унија и Западен Балкан и безбедноста на овој регион е од важно значење за Европската унија, рече денеска високата претставничка на ЕУ Каја Калас по посетата на Балканската медицинска наменска сила во касарната „Илинден“.

-Северна Македонија е доверлив партнер, целосно усогласен со заедничката надворешна и безбедносна политика на Европската унија и придонесувате во важни ЕУ мисии и операции вклучувајќи ги и ЕУФОР АЛТЕА во Босна и Херцеговина. Од наша страна ние ја поддржуваме Армијата на Северна Македонија од околу 40 милиони евра, рече Калас.

Министерот за одбрана Владо Мисајловски се заблагодари за помошта и истакна дека безбедноста во регионот е многу важна за безбедноста на Европа.

-Како земја која се гледа во големото европско семејство и земја членка на НАТО соработката во одбраната е приоритет, затоа што безбедноста на регионот и на континентот се поврзани. Очекувам со истата ефикасност и посветеност да продолжиме да ги зацврстуваме нашите одбранбени односи и нашата соработка, рече Мисајловски.

Началникот на Генералштабот на Армијата, Сашо Лафчиски, во чест на високата претставничка на ЕУ Каја Калас ѝ додели плакета и благодарност за помошта и соработката