Традиционалните статусни симболи кај луѓето најчесто се чантите и автомобилите, но во овие чудни времиња се случува дури и скромната ролна тоалетна хартија да се третира со поголема почит отколку што би се очекувало, пишува „Гардијан“.

Во тоалетите на модерните ресторани или во домовите кај некои луѓе, сè почесто може да се видат пирамиди направени од ролни хартија завиткани во сјајни, шарени или пастелни обвивки. Порано бањата се средуваше пред да се сликаат, тоалетната хартија се тргаше од кадарот, но сега Инстаграм инфлуенсерите дозволуваат ролните тоалетна хартија да се видат на нивните селфиња.

Дури и пред повеќе од 10 години, тоалетната хартијата се појави во украсно пакување, главно со шарени дезени.

Во еден момент обоената тоалетна хартија стана вистински хит. Користејќи рециклирана хартија или бамбус, производителите прво срамежливо, а потоа сè посигурно ги рекламираа своите понуди.

Ваквите симболи на потрошувачка, можеби некогаш биле дел од една мала ниша на пазарот, но од почетокот на пандемијата, тие добиваат на сила со постојаниот раст на продажбата на тоалетна хартија. Додека некои брендови сè уште може да се најдат само на интернет, други се достапни во продавниците и супермаркетите.

Кога станува збор за рекламирањето, и овде се поместуваат границите. На пример, оваа недела во Британија беше лансирана линија инспирирана од „вистинската наука“, со слики од кученца и пораки дизајнирани да помогнат да се зголеми лачењето на хормонот на среќата.

Сепак, постои уште еден фактор кој влијае на влегувањето на селфи-ролните тоалетна хартија. Станува збор за личен печат во ентериерот, кој во последните години постојано се засилува. На уредувањето на домот се пристапува сè повнимателно.

Ситните детали се клучни, а тоа оди сè до тоалетната хартија и дизајнот на нејзиното пакување. Поединечно завитканите ролни им се допаѓаат на оние кои имаат помалку простор, бидејќи се гледаат на фотографиите.

На потрошувачите не им недостигаат украсни детали за бањата. За околу 20 фунти можете да купите шише со капки кои ги маскираат „непријатните мириси со остри ноти на кора од цитрус и дискретни цветови“, додека силиконските четки за тоалет станаа култен предмет.

Се чини дека традиционалното чувство на срам, што ги придружува активностите во тоалетот, е заменето со чувството на гордост во производите што можат да го направат користењето на бањата попријатно искуство.

Изборот на еден од брендираните еко-ролни може да биде форма на впечатлив консумеризам, но исто така ви овозможува да им покажете на вашите гости тенденција за заштита на природата.

Сепак, идејата дека ролна тоалетна хартија станува статусен симбол е неприфатлива за многумина. Флер Робертс, шеф на луксузни стоки во компанијата за истражување на пазарот „Еуромонитор“, истакнува дека потрошувачите сè повеќе бараат компаниите да ги поддржат социјалните иницијативи и да го намалат влијанието врз животната средина по пандемијата.

„Можеби има нешто привлечно во големата пирамида од ролни тоалетна хартија“, вели Сабрина Фарамарзи, аналитичарка на трендови.

Таа се прашува дали популарноста на таквите пирамиди со ролни тоалетна хартија, има некаква врска со идејата дека треба да бидеме подготвени за недостиг како оној на почетокот на пандемски.

Но, премиум производите во секторот за  тоалетна хартија не се нови. Хартијата била луксузен предмет во време кога функцијата на тоалетната хартија вообичаено ја извршувале волна или лиска. Се вели дека во средновековна Европа, богатите луѓе користеле мека волна, додека посиромашните луѓе користеле погруба ткаенина.