Многумина се прашуваат како брзо да одмрзнат мелено месо, а во брзање посегнуваат по брзи решенија – го оставаат месото на кујнската плоча или дури и го прелеваат со врела вода за да го забрзаат процесот. За жал, иако практични, овие методи можат да направат повеќе штета отколку корист.

Изборот на правилни методи за одмрзнување на месото влијае не само на вкусот, туку и на безбедноста на оброкот. Меленото месо е особено чувствително – поради својата структура и голема површина, е поповолно за развој на бактерии, па затоа претпазливоста не е опција, туку неопходност, а ова се најчестите грешки што треба да се избегнуваат:

Одмрзнување на собна температура

Иако изгледа едноставно и природно, овој метод крие сериозни ризици. Надворешниот слој на месото брзо се загрева и станува идеална почва за размножување на бактерии, додека внатрешноста е сè уште замрзната. Резултатот? Зголемен ризик од труење со храна.

Врела вода

Топлата или жешката вода може брзо да го растопи мразот, но во исто време го поттикнува брзото ширење на бактериите. Површинските слоеви на месото брзо влегуваат во ризичната температурна зона, додека внатрешноста останува сирова – поради што овој метод е особено опасен.

Фрижидерот е најбезбедниот избор

Со преместување на замрзнатото месо во фрижидер (по можност на долната полица, подалеку од другата храна), му дозволувате рамномерно и безбедно да се одмрзне. Овој метод трае подолго – обично преку ноќ, но го држи месото надвор од опасната зона и го спречува развојот на бактерии.

Студена вода

Ако немате време да чекате цела ноќ, студената вода може да биде добра алтернатива. Ставете го меленото месо во водоотпорно ќесе и потопете го во ладна вода. Водата менувајте ја на секои 30 минути. На овој начин, месото ќе се одмрзне за околу еден час, но задолжително термички обработете го веднаш по одмрзнувањето.

Микробранова печка

За оние што брзаат, микробрановата печка е најбрзото решение. Сепак, бидете внимателни – месото ќе биде делумно зготвено, што значи дека треба веднаш да се зготви целосно. Користете садови соодветни за микробранова печка и избегнувајте да го оставате месото да отстои по одмрзнувањето.

Одмрзнувањето е првиот чекор во подготовката на кое било јадење и ако се направи погрешно, може да го загрози целиот процес на готвење и вашето здравје. Меленото месо е особено ризично поради начинот на кој се обработува и складира, па затоа бара дополнително внимание.

Во кујната, брзината не смее да биде поважна од безбедноста. Ако планирате да користите мелено месо, одвојте време и размислете однапред. Фрижидерот и ладната вода се вашите најдобри сојузници во зачувувањето на здравјето и квалитетот на јадењето. Бидејќи вистинската одговорност започнува пред да се загрее тавата, пишува „Сити магазин“.

.