Славниот кошаркарски тренер, Божидар Маљковиќ заедно со легендарните кошаркари Тони Кукоч и Дино Раѓа се најголемите ѕвезди на јубилејот, одбележување на 30 години од првата европска титула на Југопластика.

Младиот тим од поранешната СФР Југославија, три години доминираше во европската кошарка, но вистинско изненадување и во исто време шок претставуваше првиот триумф во 1989 година. Младите и голобради кошаркари предводени од Маљковиќ на клупата, на завршниот фајналфор турнир во Минхен, прво во полуфиналето со 87:77 ја победија Барселона за во финалето да биде совладан силниот Макаби со 75:69.

– Ние во Минхен заминавме како група граѓани, некои кошаркари немаа ниту едно влакно на брадата. Кога пристигнавме во Минхен, го добивме распоредот на настани и секаде бевме четврти, на приемите и на тренинзите и по тоа се виде што организаторите очекуваа од нас, по што на играчите им реков:

Овие веќе ни го одредија пласманот и ајде сега ние на нив да им ги расипеме прогнозите и веселбата. Дека бевме потценети говори и податокот дека дури два и пол часа траеше состанокот помеѓу ФИБА, Макаби и Арис околу тоа кој да настапува во жолти дресови, а заборавија на нас дека и ние игравме со жолти дресови. Мислам дека зборот аутсајдер  беше измислен поради нас – вели Маљковиќ.

Освен што ги потценија организаторите но и конкурентите, Маљковиќ одлучи дополнително да ги мотивира кошаркарите и тоа преку навреди.

– Секој ден ги провоцирав моите кошаркари. На Раѓа му зборував, какви ти се тие бицепси, погледни го Норис. На Кукоч му зборував дека има толку тенки нозе што можеше да ги пере во епрувети. На Душко Ивановиќ му велев дека е маченик од Црна Гора. Ги навредував и ги провоцирав и на крајот тоа ни се исплатеше – зборува Маљковиќ.