Забраната за пушење во затворени простори неодамна стана реалност во Федерацијата Босна и Херцеговина. И додека најмногу ќе бидат погодени угостителските објекти, рестораните и кафулињата, новата регулатива веројатно ќе му даде поинаква димензија и на ноќниот живот. А дали ќе се подобри или ќе се „обесхрабри“ – времето ќе покаже, објави Кликс.ба. Уредбата, која официјално стапи во сила на 13 декември, несомнено претставува пресврт и за возрасните пушачи и за целиот угостителски сектор. Освен што ќе подлежат на промени „потивките“ типови на излегувања, различно ќе изгледа и ноќниот живот во градовите.

Првите реакции во БиХ се мешани. Иако отстранувањето на „димната завеса“ може да создаде поудобен простор за дружење, танцување и забава, сопствениците и менаџерите на ноќните клубови не кријат дека се скептични и загрижени, надевајќи се на прилагодување на законот и „поопуштени“ прописи. Но, дали овие правила можат да донесат нешто позитивно? Што велат од ноќните клубови? Во разговор со претставници на одредени ноќни клубови, барови и пабови во Сараево, Тузла, Мостар и Чапљина ни рекоа дека првите впечатоци од стапувањето во сила на Уредбата се позитивни кога станува збор за непушачите, пренсува Кликс.ба. Меѓутоа, поинаку е, се разбира, кај пушачите.

„Непушачите дефинитивно со нетрпение го очекуваат овој закон, а пушачите негодуваат и чувствуваат дека им се ускратени правата. Ја користат можноста да излезат пред кафуле и да ја пушат цигарата. Мое мислење е дека се потребни алтернативи. Непушачите треба да уживаат во него непречено, без да вдишуваат чад од тутун што им штети, додека за пушачите треба да се обезбедат посебни простории“, рече Денис Стојниќ, еден од најпознатите сараевски угостители.