За Италијанците подготовката и уживањето во кафето е начин на живот, но во зависност од делот на земјата во кој живеат или од кој доаѓаат, се разликуваат и навиките. 20 региони и повеќе од 8.000 градови во Италија се карактеризираат со бројни разлики. Кафето во Венеција е генерално со полн вкус и ароматично, со ноти на ориентален мирис на ванила. Во Милано е лесно и нежно, а во Пиемонт и Лигурија е поробусно.

Ако се најдете во Трст и сакате еспресо во кафуле, волшебниот збор е неро, а капо е макијато, односно еспресо со малку пенливо млеко. Марочино, кое се пие во Милано, се карактеризира со додавање на какао, кое се додава во еспресото со млеко. Во Торино се вика бицерин, а во Апулија треба да нарачате еспресино. Во Неапол еспресото е многу ценето, а најпосакувано е краткото и јако. Нарачајте еспресо кон пана ако сакате еспресо со шлаг.

За да нарачате кафе како Италијанец, треба да запомните дека кафињата со млеко, како што се капучино, кафе лате и макијато, се резервирани за утринските часови, а доколку ги нарачате во текот на попладневните часови, може да предизвикате дури и потсмев. Исто така, ваквите кафиња не се пијат после оброк.

Италијанците уживаат во своето еспресо брзо, многу често од нога, а ако одлучите да седнете во кафуле, ќе платите повеќе за тоа. Пократко од еспресото е ристрето, а лунго или американо е подолго. Треба да се има предвид дека американо не е толку благо како американското кафе и има значително помалку вода по количина на кафе. За побрзо да си дојдете на себе по непроспиената ноќ, ќе ви помогне допио, односно двојно еспресо.

Лате макијато е млеко во кое се додава еспресо, а за подготовка се користат истите состојки како и за кафе лате, но нивниот изглед е различен. Лате макијато треба да се служи во висока чаша и да се подготви така што различните слоеви да бидат јасно видливи.