Зголемувањето на акцизите на почетокот на февруари ќе донесе повисоки цени на кафето во Србија. Сепак, тоа ќе биде само едно во низата поскапувања на овој омилен пијалак на многу потрошувачи. Цената на кафето во изминатиот период е зголемена поради недостигот на овој производ на светскиот пазар. Дали е само една лоша реколта или долгорочен проблем, тешко е да се каже, а економистите проценуваат дека без разлика на поскапувањето во Србија, потрошувачката на овој производ нема да се намали. Владата на Србија донесе одлука да ги зголеми акцизите, односно да ги усогласи со ланската инфлација од 4,5 отсто.

Акцизата на непеченото кафе се искачи на 112,71 динари за килограм од 108,06 динари. Цената на печеното кафе скокна од 135,07 на 140,88 динари за килограм. Според статистичките податоци, просечен жител на Србија пие околу четири килограми кафе годишно, односно околу 600 шолји годишно. По новото покачување на акцизата, нема дилема дека кафето и неговите производи ќе поскапат, без разлика дали ги купувате во продавници или ги нарачувате во ресторани. Граѓаните забележале дека утрово во некои продавници нема кафе, не можело да се најде кафе од ниту еден производител. Горан Радосављевиќ, професор на факултетот ФЕФА, за Нова.рс вели дека кафето автоматски поскапува штом се зголеми акцизата за него. Тој забележува дека Србија е една од ретките земји во Европа која има акциза за кафето, бидејќи на Запад, како што наведува, акцизите се почести на производите со додаден шеќер отколку на кафето.