Лето – омиленото годишно време ни е во мислите во текот на целата година, бидејќи ја храни нашата душа. Сонце, море, плажа, патувања, посета на магични градови, чисто задоволство…

Во оваа летна приказна не се исклучок ниту нашите јавни личности. Иако ним најчесто летниот период им е исполнет со професионални ангажмани, секако сакаат да најдат слободно време за летен одмор, да се растоварат од обврските, да побегнат од градскиот метеж и вжештените улици.

Дел од нив за „Слободен печат“ открија како го поминуваат летото, кои им се омилените места за летен одмор во Македонија и надвор од нејзините граници и која им е дестинација од соништата.

Дина Јашари

Младата и просперитетна пејачка и кантавторка Дина Јашари е професионално преангажирана последниов период, особено летово. Многу настапи, концерти и патувања во целиот регион и Европа, каде што несомнено ги освои симпатиите на сите што присуствуваат на нејзините концерти. Дина вели дека интензивно патува ова лето и ја користи секоја можност да ужива во слободното време.

На прашањето како ќе го помине ова лето, Дина вели:

– На турнеја. Веќе неколку месеци постојано патуваме, имавме настапи во Загреб, Будимпешта, Краков, Осиек… Само што се вративме со бендот од Нови Сад од фестивалот „Егзит“, веднаш тргнавме на пат кон Хрватска, овој пат во дуо-формат со Лука. Сега сме во Дрвеник, нѐ чекаат Макарска, Шибеник, „Зларин стрит фестивал“, Мљет, Загреб, Ластово. Додека сме на приморје и на острови, ја користиме секоја можност да попливаме во Јадранско Море.

Како го замислуваш твојот одмор од соништата?

– Да ги посетам Хавајските Острови и да јадам манго по цели денови.

Омилено место во Македонија за бегање од секојдневието?

– Село Ораовец, Велешко, кај баба ми и дедо ми. Голем дел од текстот на „Дома“ е инспириран од времето поминато во недопрената природа таму, а во спотот на „Бои“ има и снимки. Би сакала да имам многу повеќе слободно време за да сум почесто таму.

Сашка Димитровска

Нашата позната актерка, вработена во Македонскиот народен театар, периодов игра на неколку регионални фестивали со екипата од матичниот театар и, како што вели, одлично се прифатени од тамошната публика.

Плановите за летово ѝ се врзани со семејството и приспособени на нивните ангажмани.

– По запишувањето на големиот син во средно училиште, следува заслужен фамилијарен распуст, посветени едни на други. Првата станица ни е Охрид, потоа фамилијарно одиме на концерт на „Депеш мод“ во Загреб и оттаму се упатуваме кон Италија. Втората половина од одморот ќе уживаме таму, речиси 20 дена и верувам ќе ни ги „разбуричка“ сите сетила. Впрочем, таа е нашата омилена земја, која често ја посетуваме – вели Сашка.

Дали имаш професионални ангажмани летово?

– Секако, ги играм редовните претстави на репертоарот на МНТ и во моментот сум на два фестивали во Црна Гора, во Будва и во Тиват со претставата „Народен непријател“ во режија на Нина Николиќ и мислам дека имаме одличен прием кај публиката. Од септември со „наполнети батерии“ во нови проекти.

Како го замислуваш твојот одмор од соништата?

– Јас сум летно дете, па следствено на тоа, природно ми е да сакам сонце, вода, чисто море или езеро, децата покрај мене, книга, чист воздух и среќни луѓе.

Омилено место во Македонија за бегање од секојдневието?

– Омилен град ми е Охрид, но ќе ги наведам и Прилеп и Крушево, како градови што секогаш ми будат убави чувства и затоа секогаш им се навраќам. Прилеп го има најпрекрасниот театарски ансамбл и фестивал, а Крушево ме потсетува на детството… Прекрасна зелена природа, Тоше и споменикот „Македониум“.

Јанг Дади

Давид Даниловски или Јанг Дади, како што многумина го познаваат, е еден од нашите најпопуларни млади хип-хоп артисти. Со својата музика успеа да ја освои домашната, но и регионалната публика, што секако резултира со многу концерти и настапи периодов. Еден од позначајните настапи е учеството на најголемиот регионален фестивал „Егзит“, за кој вели дека му било одлично искуство.

Како ќе го поминеш летото?

– Откога започна летото, посетив многу држави. Бев во Холандија на еден од најпознатите фестивали на хип-хоп и афро-сцената „Роулинг лауд“ и нормално, покрај тоа, го „ѕирнав“ и Амстердам. Следна дестинација ми беше Германија, каде што остварив одлични контакти за работа. Оттаму директно отидов во Белград, еден од моите омилени градови во соседството. По неколку денови во Белград, се упативме во Нови Сад, на фестивалот „Егзит“, каде што настапував и тоа беше одлично искуство. И како да не ми беше доволно, дојдов на неколку денови во Скопје, па веднаш заминав за Барселона. Сега ви пишувам оттаму, а кога ќе се вратам, ме чека многу работа.
Останатиот дел од летото ќе се посветам на вториот дел од албумот, а ме чекаат и многу настапи низ Македонија.
Оваа година секој ден ми е исполнет со работа. Со мојот тим неуморно смислуваме нови концепти, работиме на нови песни. Како што напоменав, работиме на вториот дел од проектот „Скорпиус“ – вели Дади за тоа како ќе го помине ова лето.

Како го замислуваш твојот одмор од соништата?

– На некој пуст остров, легнат на лулашка врзана за две палми, бел песок и тиркизен океан.

Омилено место во Македонија за бегање од секојдневието?

– Кога ќе ме измори градот, знам да избегам во мојата викендичка. Планинскиот воздух и тишината се мојот излез од секојдневието.