Истанбул е една од најпосакуваните дестинации на Македонците за Денот на вљубените. Но, како што велат во туристичките агенции, понуда има и за други бројни дестинации – Прага, Милано, Рим, Венеција, Сараево, Будимпешта, како и за спа и ски центрите.

Понудите за „бисерот на Босфорот“ се движат од 4.000 денари и најчесто се за четири дена и две ноќевања со појадок, а се патува со автобус.

– Турите за Истанбул, Букурешт и за Сараево се целосно пополнети, а исто така е со Банско. Најпосакувана ни е турата за главниот град на Турција, каде што патниците можат да ги видат убавините на овој град, а покрај аранжманот се нудат и факултативни излети кои дополнително се плаќаат – велат од туристичката агенција „Мартин“.

Во Будимпешта може да се патува за 8.000 денари со вклучен автобуски превоз, пет дена и две ноќевања со појадок , додека патувањата во „Трансилванија“, како и посетата на замокот на Дракула, градот Брашов и Термалните бањи дополнително се наплатуваат.

Посетата на Сараево или „Ерусалим на Балканот“, според агенциите со кои разговаравме, е понуда која речиси секаде е пополнета. Овој град е еден од само неколкуте големи европски градови кои имаат една џамија, католичка црква, православна црква и синагога во исто соседство.

– За 95 евра туристите, покрај Сараево и неговите знаменитости, ќе можат да ги погледнат и Мостар и Вишеград. Во цената на овој аранжман се вклучени две ноќевања во Сараево со појадок, автобуски превоз, разгледување на градот со локален водич. Исто така имаме факултативни активности, како крстарење по Дрина за 5 евра, ноќна посета на Сараево со посета на пивница, исто така за 5 евра – велат од туристичката агенција „Стаф“.

Оттаму ни рекоа дека за „Валентајн“ се продадени и неколку аранжмани за посета на Милано по цена од 359 евра со авионски превоз, но дека станува збор за индивидуални посети кои тие им ги нудат на своите клиенти.