Маж во Јужна Кореја е уапсен за напад доцна во ноќта врз жена вработена во продавница, откако мислел дека била феминистка. На снимката од безбедносните камери се гледа како мажот на околу 20-ти години влегува во продавницата во југоисточниот град Џинџу по полноќ и ја удира жената со тупаници и клоци, пишува Би-Би-Си.

Тој нападнал и друг човек кој пазарел во продавницата, на околу 50 години, кој се обидел да интервенира. Полицијата соопшти дека тој ја нападнал жената затоа што имала кратка коса и затоа претпоставувал дека е феминистка.

„Бидејќи имаш кратка коса, мора да си феминистка. Јас сум машки шовинист и мислам дека феминистките заслужуваат да бидат нападнати“, ѝ рекол тој, според полициските коментари што ги објави весникот „Кореа Хералд“.

Тој продолжил со нападот додека не бил спречен од полицијата која пристигнала на местото на настанот. Властите соопштија дека тој бил во пијана состојба, а претходно му била дијагностицирана и лекувана шизофренија.

Помеѓу економски напредните земји, Јужна Кореја често е рангирана како една од најлошите за жените, со лоша родова еднаквост. Антифеминистичкото чувство исто така се зголеми во последниве години – особено кај младите мажи кои чувствуваат дека се обесправени поради обратна дискриминација.

По нападот во петокот, жената на околу 20 години се здобила со сериозни повреди на увото и лигаментите, но не била во животна опасност, соопшти полицијата. Клиентот кој интервенирал се здобил и со скршеници на лицето и рамото откако бил удрен со стол. Полицијата соопшти дека во неделата поднела барање за налог за задржување на наводниот сторител во притвор.

Жените со кратка коса и претходно биле мета на напади во Јужна Кореја – каде што многу напаѓачи ја поврзуваат фризурата со феминизам. Во 2021 година, во една вирална кампања за солидарност, жените во оваа земја си ја исекоа косата во одбрана на олимпијката која освои неколку златни медали во стрелање на Игрите во Токио, но доби огромни критики на социјалните мрежи поради кратката коса.