Јужна Кореја воведе безвизен режим за кинеските туристички групи, објави Ројтерс. Мерката, која стапува на сила денес, има за цел да ја стимулира економијата и да помогне во подобрувањето на врските на Јужна Кореја со Кина. Како дел од пилот-програмата, која ќе важи до јуни следната година, групи од три или повеќе туристи од континентална Кина ќе можат да останат во земјата без виза 15 дена. Овој потег доаѓа пред празникот на Националниот ден на Кина од 1 до 8 октомври, како и низа јужнокорејски празници што се совпаѓаат со празникот. Јужнокорејските компании се обидуваат да ја искористат зголемената побарувачка.

„Шила Дати Фри“ организира крстаречка турнеја низ Кина, а апликацијата за достава на храна „Баедал Минџок“ воведува опции за плаќање преку „Алипеј“ и „ВеЧат Пеј“. Програмата, објавена во март, следи по одлуката на Кина минатиот ноември да понуди безвизно патување за јужнокорејските граѓани до 30 дена. Јужна Кореја последен пат понуди сличен безвизен режим за континентална Кина од декември 2017 до март 2018 година, што се совпадна со Зимските олимписки игри во Пјонгчанг.

Новата администрација на јужнокорејскиот претседател Ли Џе-мјеон се надева дека дополнително ќе ги подобри односите со Кина за време на очекуваната посета на претседателот Си Џинпинг на Јужна Кореја кон крајот на октомври за самитот на Азиско-пацифичката економска соработка, пренесува БТА.