Во јужниот дел на Европа беснее најлошиот пожар во историјата. Екстремната топлина над 40 степени и ветровите ги разгоруваат пожарите во Грција, Турција, Северна Македонија и Италија.

Илјадници луѓе мораа да ги напуштат своите домови во предградијата на Атина, а стотици беа евакуирани со чамци од блискиот остров Евбоја.

„Ова е најтешкиот ден досега во однос на временските услови во последните 10 дена. Од вчера попладне ширум земјата избија бројни нови пожари. Во моментов имаме 56 активни пожари“, рече Никос Хардалис, грчки министер за цивилна заштита.

Досега се хоспитализирани најмалку девет лица, од кои двајца доброволни пожарникари се лекуваат од изгореници на интензивна нега во Атина. Над 150 шумски пожари избија низ Грција, голем број на куќи беа уништени, а десетици градови и села беа евакуирани.