Италијанскиот гигант Јувентус ја продолжи соработката со напаѓачот Аркадиуш Милик и покрај тоа што полскиот голгетер е надвор од терените поради повреда подолго време и сезонава не одигра ниту минута.

Новиот договор ќе го задржи Милик во Торино до летото 2027 година, а според италијанските медиуми, 30-годишниот репрезентативец на Полска ќе заработува околу 3,5 милиони евра по сезона. Од клубот порачуваат дека продолжуваат да веруваат во неговите квалитети и дека очекуваат негов целосен камбек по рехабилитацијата.

Милик официјално стана дел од „Старата дама“ во 2023 година, откако претходно една сезона настапуваше како позајмен играч. Во дресот на Јувентус има одиграно 75 натпревари и постигнато 17 голови.

Оваа одлука доаѓа во време кога Јувентус располага со ограничени напаѓачки опции – во тимот засега остануваат само српскиот голгетер Душан Влаховиќ и Рандал Коло Муани, на кого наскоро му истекува позајмицата од Пари Сен Жермен.