Сопругата на рускиот опозициски лидер Алексеј Навални, кој почина минатиот петок во руски затвор, на социјалната мрежа Х ја објави првата фотографија со својата ќерка Дарија.

„Мило мое девојче, долетав до тебе да те гушнам и да те поддржам, а ти седиш и ме поддржуваш мене“, напиша Јулија.

Таа тогаш рече дека нејзината ќерка е многу храбра и непоколеблива.

„Можеме да се справиме со сѐ, љубов моја. Добро е што си до мене. Те сакам“, додала Јулија во пораката.

Алексеј Навални и неговата сопруга Јулија покрај ќерката Дарија имаат и петнаесетгодишен син.

Милая моя девочка. Я же прилетела тебя обнять и поддержать, а ты сидишь и поддерживаешь меня.
Такая сильная, смелая и стойкая. Мы обязательно со всем справимся, родная. Как хорошо, что ты рядом. Люблю. pic.twitter.com/FzDbrykUjH

— Yulia Navalnaya (@yulia_navalnaya) February 22, 2024

Дарија претходно во неколку наврати објавуваше статуси на социјалните мрежи во кои му дава поддршка на својот татко и бара негово ослободување.

Студира на Универзитетот Стенфорд во САД.

Со оглед на тоа што Јулија објави фотографија со својата ќерка, се верува дека по смртта на сопругот отпатувала кај децата во САД.

Претходно во петокот таа одржа говор на конференцијата во Минхен каде директно го обвини рускиот претседател Владимир Путин за смртта на нејзиниот сопруг.

Потоа во понеделникот беше гостин во Брисел на состанокот на министрите за надворешни работи на ЕУ. Истиот ден објави видео во кое нагласи дека ќе продолжи таму каде што застанал нејзиниот сопруг.

Да потсетиме, претходно денеска Људмила Навалнаја објави дека вчера конечно можела да го види телото на нејзиниот син Алексеј.

„Штотуку излегов од зградата на Истражниот комитет на градот Салехард. Поминав речиси еден ден таму сама, сама со истражителите и криминолозите. Адвокатите беа ослободени дури попладне“, вели мајката на Навални, Људмила во видеото објавено на YouTube.

За потсетување, рускиот опозициски лидер Алексеј Навални почина во петок на 16 февруари во руски затвор, потврди руската Федерална поправна служба за областа Јамало-Ненец, додавајќи дека Навални се чувствувал лошо по утринската прошетка и изгубил свест, по што неуспешно го реанимирале.

Навални отслужувал 30-годишна затворска казна, меѓу другото, за, како што е наведено во една од пресудите на рускиот суд, за основање и финансирање на екстремистичка организација и нејзините активности, а бил познат и како остар критичар на Кремљ.