Јавното претпријатие Тетово транспорт работи со позитивно салдо. За изминативе 6 месеци како што посочуваат општинските власти претпријатието е во добивка од 2 милиони денари.

Сето тоа е резултат на субвенциите кои ова претпријатие ги добива од локалната самоуправа, а целта е претпријатието да не оди во загуба односно да не згасне, а потоа и граѓаните да останат без јавеn превоз.

„Ние донесовме одлука да го субвенционираме ова претпријатие оти ретко овие претпријатија се рентабилни. Билетите се продаваат за 20 денари и некаде 80 % од билетот е покриен од локалната самоуправа, само 20% од билетот го плаќаат граѓаните. И покрај ваквата состојба не се планира да поскапи билетот.Според математиката треба 120 денари да се продава билетот за да работи претпријатието рентабилно, тоа е премногу за разлика од сегашната цена на билетот која изнесува 20 денари. Ние само сакаме да ги мотивираме граѓани се повеќе да го користат јавниот превоз, затоа и не планираме да поскапи билетот. Користењето на јавниот превоз значително ќе го намали сообраќајниот хаос во градот, но и ќе го намали аерозагадувањето“, посочија општинските власти.

Јавното претпријатие „Тетово транспорт“ речиси три години откако е оформено опстојува со финансиска помош од општинската каса.

И покрај лошата финансиска состојба општинските власти за наредната година планираат во ЈП Тетово транспорт да вработат дополнителни 25 лица.

Инаку автобусите, освен учениците ретко кој ги користи.Тетовци велат дека низ град се почесто одат или со велосипед или пеш, оти сообраќајниот хаос го попречува нормалниот проток на возила, особено на градските автобуси.

Десет години градските власти најавуваат ефикасен транспорт за граѓаните. Петте градски автобуси беа промовирани пред три години. За нив општината плати 720 000 евра , но наместо на коловозите, тие беа 8 месеци гаражирани, со образложение дека треба да се создадат услови, за да започнат да превезуваат патници.

Соодветни услови за градскиот превоз во Тетово се уште не се создадени, но автобусите си возат со финансиски инекции на општинските власти.

ЈП „Тетово Транспорт“ работи со големи загуби, градските автобуси возат полупразни