Хидросистемот „Стрежево“ е првото јавно претпријатие во државата кое со сопствени средства во вредност од околу 30 милиони денари изгради своја фотонапонска електроцентрала на земја со моќност од 500kW.

Централата е лоцирана кај браната „Стрежево“, се градеше четири месеци, а нејзините технички карактеристики се 1248 монокристални фотонапонски панели, шест инвертори со моќност од 440 kW и годишно производство околу 700 000kWh.

– Приклучокот на фотонапонската централа на Македонскиот енергетски систем ќе биде на сопствена трафостаница и на сопствен 35 kV – ен далековод. Со оваа инвестиција започнуваме и процес на искористување на сончевата енергија како обновлив извор за добивање на електрична енергија. Ова е првата изградена фотоволтаична централа со можност на изградба и на втора централа од ваков тип со оглед на фактот што имаме добиено дозвола за градба до 1MW-вели директорот на ЈП „Стрежево“ Менде Граматковски.

Тој додаде дека со оваа инвестиција се зголемуваат приходите на претпријатието, а за државата е инвестиција во добивање на „чиста“ енергија.

Досега јавното претпријатие стопанисуваше со пет мали хидроцентрали (седум агрегати) и расположливите водни ресурси ги користеле рационално, ефикасно и повеќенаменски за наводнување и производство на електрична енергија.

– Произведената електрична енергија ќе ја продаваме на слободниот пазар преку јавна продажба. Во време на големи предизвици и неизвесности, „Стрежево“ издржа силен финансиски удар и благодарение на домаќинското работење успеа да го затвори наметнатиот проблем од 2015 година во врска со тужбата на ЗК „Пелагонија“-рече Граматковски и додаде дека ЈП „Стрежево“ е ликвидно претпријатие со стабилна финансиска состојба, редовно им се исплаќа плата на вработените и во континуитет вложува во тековни и капитални инвестиции.

Инаку, јавното претпријатие „Стрежево“ има вкупно 240 вработени.