Актуелниот претседател на Одбојкарската федерација на Македонија, Петар Јовановски и во наредните четири години ќе биде предводник на ОФМ откако денеска повторно ја доби довербата од делегатите на изборното собрание.

Јовановски кој веќе 11 години е на чело на ОФМ, на денешното изборно собрание имаше само еден противкандидат, поранешниот репрезентативец Јовица Симовски, а „претседателскиот смеч“ заврши со 17:4 во корист на актуелниот претседател.

ОФМ најголемиот успех го имаше минатата година кога за прв пат успеа да настапи на Европско првенство.
Старо-новиот предводник на македонската одбојка на собранието доживеа еден „пораз“ откако не беше усвоен финансискиот извештај за минатата година поради што ќе биде ангажирана ревизорска куќа да направи нов извештај.