Економскиот експерт Бранимир Јовановиќ, кој живее и работи во Австрија, во анализа на заемот од Велика Британија и „стратешкото партнерство“ за БИРН вели дека ваквите потези се проблематични.

„Колку се проблематични ваквите проекти, најдобро се гледа од унгарскиот заем. И него го најавуваа помпезно уште пред да стапат на власт, ги криеја деталите од очите на јавноста, не консултираа ни професори, ни невладини, ни никој во процесот. И сега, една година откако беше најавен заемот, не гледаме ама баш ништо од него. Тоа мислам дека ќе се случи и сега. Ќе се тресе гората неколку месеци, а нема ни глувче да се роди. Впрочем, ова не е првпат некој во Македонија да најавува милијарди. Тупурковски го почна процесот во 1990-тите, Груевски гордо го продолжи, Заев го заокружи. Од толку многу милијарди, вистинско чудо е како сме уште најсиромашната земја во Европа“, вели Јовановиќ.

„Сега ова се претставува како стратешко партнерство со Британија, што дава доза на сериозност, ама ни тоа не е гаранција дека навистина ќе има инвестиции од пет милијарди фунти. Од она малку што беше споделено со јавноста, може да се заклучи дека договорот само дава основа за соработка во висина до пет милијарди фунти, ама не и дека навистина има проекти во целиот тој износ. И мислам дека токму ова е главната причина за нетранспарентноста и за неинклузивноста – ако се знаат деталите и ако се вклучени стручни независни лица во процесот, владата нема да може да продава приказни од кои на крајот нема да има ништо“, додава Јовановиќ.

Според него, заемот значително ќе го зголеми долгот на државата.

„Мислам дека нема никаква дилема кај економистите дека јавниот долг ќе порасне. Прашањето е само колку, и тоа ќе зависи од деталите, кои, за жал, не ги знаеме. Ама еве да претпоставиме дека на почеток ќе се финансираат само железницата и болниците, кои беа спомнати од неколку министри, и за кои беше кажано дека ќе чинат околу две милијарди евра. Со тие две милијарди, јавниот долг ќе порасне од сегашните 10 на 12 милијарди, што со БДП од околу 16 милијарди, значи дека јавниот долг ќе порасне од 62 проценти на 75 отсто од БДП. Не мислам дека е тоа страшно само по себе – ако навистина се изградат болници и железница со тие пари, тоа на долг рок ќе се исплати. Ама мислам дека владата никако не смее да пласира приказна дека јавниот долг нема да порасне, затоа што тој балон кога-тогаш ќе им пукне, и ќе им биде многу тешко да објаснат зошто се случило тоа“, вели економистот.