Македонската репрезентативка Јована Кипријановска (23) официјално е нова ракометарка на унгарскиот клуб Сомбатељ чиј дрес ќе го носи следната натпреварувачка сезона 2025/2026.

Десниот бек досега настапуваше во Франција каде две сезони настапуваше за тимот на Самбр Авенуа.

Кипријановска со македонската репрезентација учествуваше на Европското првенство во 2024 година. На клупски план ја почна кариерата во ЖРК Куманово, а потоа се пресели во Франција во 2022 година.

Уште една наша репрезентативка настапува за екипата на Сомбатељ, Ивана Џатевска, која минатиот месец потпиша нов договор на една година.

– Многу сум среќна што сум дел од овој тим. Возбудена сум поради новите предизвици и можностите да постигнам нешто поголемо со клубот и да се развивам себеси во тој процес. Верувам дека овој тим е способен за сериозни резултати, бидејќи веќе докажаа дека сè е можно за нив. Голема радост е за мене, а еден сон ми се оствари, да можам да ја продолжам кариерата во толку силна лига како унгарската, која е полна со одлични тимови и играчи. Едвај чекам да почнеме да работиме заедно, да се запознаеме со сите и се надевам дека ќе можеме да прославиме многу победи заедно! Ајде, Сомбатељ! – изјави Кипријановска за клупскиот сајт.